6. Doṇasuttavaṇṇanā

[36] Chaṭṭhe antarā ca ukkaṭṭhaṃ antarā ca setabyanti ettha ukkaṭṭhāti ukkāhi dhāriyamānāhi māpitattā evaṃladdhavohāraṃ nagaraṃ. Setabyanti atīte kassapassa sammāsambuddhassa jātanagaraṃ. Antarāsaddo pana kāraṇakkhaṇacitta- vemajjhavivarādīsu vattati. "tadanantaraṃ ko jāneyya aññatra tathāgatā"ti ca, "janā saṅgamma mantenti, mañca tañca kimantaran"ti ca ādīsu hi kāraṇe. "addasā maṃ bhante aññatarā itthī vijjantarikāya bhājanaṃ dhovantī"tiādīsu khaṇe. "vassantarato na santi kopā"tiādīsu citte. "antarā vosānamāpādī"tiādīsu vemajjhe. "api cāyaṃ tapodā dvinnaṃ mahānirayānaṃ antarikāya āgacchatī"tiādīsu vivare. Svāyamidha vivare vattati. Tasmā ukkaṭṭhāya ca setabyassa ca vivareti evamettha attho daṭṭhabbo. Antarāsaddena payuttattā upayogavacanaṃ kataṃ. Edisesu ca ṭhānesu akkharacintakā "antarā gāmañca nadiñca yātī"ti evaṃ ekamettha antarāsaddaṃ payuñjanti, so dutiyapadenapi yojetabbo hoti, ayojiyamāne upayogavacanaṃ na pāpuṇāti. Idha pana yojetvā evaṃ vuttoti.

Addhānamaggapaṭipanno hotīti addhānasaṅkhātaṃ maggaṃ paṭipanno hoti, dīghamagganti attho. Kasmā paṭipannoti? taṃdivasaṃ kira bhagavā idaṃ addasa "mayi taṃ maggaṃ paṭipanne doṇabrāhmaṇo mama padacetiyāni passitvā padānupadiko hutvā mama nisinnaṭṭhānaṃ āgantvā pañhaṃ pucchissati, athassāhaṃ ekaṃ saccadhammaṃ desissāmi, brāhmaṇo tīṇi sāmaññaphalāni paṭivijjhitvā dvādasapādasahassaparimāṇaṃ