Iti saccaparāmāso diṭṭhiṭṭhānā samussayāti iti saccaṃ iti saccanti gahaṇaparāmāso ca diṭṭhisaṃkhātāyeva diṭṭhiṭṭhānā ca ye samussitattā upagantvā ṭhitattā samussayāti vuccanti te sabbepi. Idha ṭhatvā diṭṭhiṭṭhānā samūhatāti iminā padena saddhiṃ yojanā kātabbā. Kassa pana etā esanā paṭinissaṭṭhā ete ca diṭṭhiṭṭhānā samūhatāti. Sabbarāgavirattassa taṇhakkhayavimuttino yo hi sabbarāgehi virato taṇhakkhaye parinibbāne pavattāya arahattaphalavimuttiyā samannāgato tassa esanā paṭinissaṭṭhā diṭṭhiṭṭhānā ca samūhatā. Save santoti so evarūpo kilesasantatāya santo. Passaddhoti dvīhi kāyacittapassaddhīhi passaddho. Aparājitoti sabbakkilese jinitvā ṭhitattā kenaci aparājito. Mānābhisamayāti mānassābhisamayena. Buddhoti cattāri saccāni bujjhitvā ṭhito. Iti imasmiṃ suttepi gāthāsupi khīṇāsavova kathitoti.