9. Ānandaacchariyasuttavaṇṇanā

[129] Navame bhikkhuparisā ānandaṃ dassanāyāti ye bhagavantaṃ passitukāmā theraṃ upasaṅkamanti, ye vā "āyasmā kirānando samantapāsādiko abhirūpo dassanīyo bahussuto dhammakathiko saṃghasobhano"ti therassa guṇe sutvā āgacchanti, te sandhāya "bhikkhuparisā ānandaṃ dassanāya upasaṅkamatī"ti vuttaṃ. Eseva nayo sabbattha. Attamanāti "savanena no dassanaṃ sametī"ti sakamanā tuṭṭhacittā. Dhammanti "kacci āvuso khamanīyaṃ, kacci yāpanīyaṃ, kacci yonisomanasikāre kammaṃ karotha, ācariyupajjhāyavattaṃ pūrethā"ti evarūpaṃ paṭisanthāradhammaṃ. Tattha bhikkhunīsu "kacci bhaginiyo aṭṭhagarudhamme samādāya vattathā"ti idampi nānākāraṇaṃ hoti. Upāsakesu "svāgataṃ upāsaka, na te kiñci sīsaṃ vā aṅgaṃ vā rujjati, arogā te puttabhātaro"ti evaṃ paṭisanthāraṃ na karoti, evampana karoti "kathaṃ upāsakā tīṇi saraṇāni pañca sīlāni rakkhatha, māsassa aṭṭha uposathe karotha, mātāpitūnaṃ upaṭṭhānavattaṃ pūretha, dhammike samaṇabrāhmaṇe paṭijaggathā"ti. Upāsikāsupi eseva nayo.