4. Saṃvarasuttavaṇṇanā

[14] Catutthe padhānānīti viriyāni. Saṃvarappadhānanti cakkhādīni saṃvarantassa uppannaviriyaṃ. Pahānappadhānanti kāmavitakkādayo pajahantassa uppannaviriyaṃ. Bhāvanāppadhānanti sambojjhaṅge bhāventassa uppannaviriyaṃ. Anurakkhanāppadhānanti samādhinimittaṃ anurakkhantassa uppannaviriyaṃ.

Vivekanissitantiādīsu viveko virāgo nirodhoti tīṇipi nibbānassa nāmāni. Nibbānañhi upadhivivekattā viveko, taṃ āgamma rāgādayo virajjantīti virāgo, nirujjhantīti nirodho. Tasmā vivekanissitantiādīsu ārammaṇavasena vā adhigantabba- vasena vā nibbānanissitanti attho. Vossaggapariṇāminti ettha dve vossaggā pariccāgavossaggo ca pakkhandanavossaggo ca. Tattha vipassanā tadaṅgavasena kilese ca khandhe ca rāgaṃ pariccajatīti pariccāgavossaggo. Maggo ārammaṇavasena nibbānaṃ pakkhandatīti pakkhandanavossaggo. Tasmā vossaggapariṇāminti yathā bhāviyamāno satisambojjhaṅgo vossaggatthāya pariṇāmati, vipassanābhāvañca maggabhāvañca pāpuṇāti, evantaṃ bhāvetīti ayamettha attho. Sesapadesupi eseva nayo. Bhaddakanti laddhakaṃ. Samādhinimittaṃ vuccati aṭṭhikasaññādivasena adhigato samādhiyeva. Anurakkhatīti samādhipaccanīkadhamme rāgadosamohe sosento rakkhati. Ettha ca aṭṭhikasaññādikā