@9 Ma. abhimukho

"na me ācariyo atthi sadiso me na vijjati

sadevakasmiṃ lokasmiṃ natthi me paṭipuggalo"ti- ādīhi cassa suttehi aññesaṃ buddhānaṃ abhāvo dīpetabbo. Tasmāti yasmā sabbepi buddhā saddhammagaruno, tasmā. Mahattamabhikaṅkhatāti mahantabhāvaṃ patthayamānena. Saraṃ buddhānasāsananti buddhānaṃ sāsanaṃ sarantena.

Yatoti yasmiṃ kāle. Mahattena samannāgatoti rattaññumahattaṃ vepullamahattaṃ brahmacariyamahattaṃ lābhaggamahattanti iminā catubbidhena mahattena samannāgato. Atha me saṃghepi gāravoti atha mayhaṃ saṃghepi gāravo jāto. Kasmiṃ pana kāle bhagavatā saṃghe gāravo katoti? mahāpajāpatiyā dussayugadānakāle. Tadā hi bhagavā attano upanītadussayugaṃ "saṃghe gotami dehi, saṃghe te dinne ahañceva pūjito bhavissāmi saṃgho cā"ti vadanto saṃghe gāravaṃ akāsi nāma.