@5 Ma. koḷikaseṭṭhiputtassa 6 cha.Ma. karontova Pañca acelakasatāni nimantesi. So tesu nisinnesu "dhītā me āgantvā arahante vandatū"ti cūḷasubhaddāya pesesi. Āgataphalā ariyasāvikā arahanteti vuttamatteyeva "lābhā vata me"ti uṭṭhahitvā gatā te nissirikadassane acelake disvāva "samaṇā nāma na evarūpā honti tāta, yesaṃ neva ajjhattaṃ hiri, na bahiddhā ottappaṃ atthī"ti vatvā "na ime samaṇā"ti kheḷaṃ pātetvā nivattitvā attano vasanaṭṭhānameva gatā.

Tato acelakā "mahāseṭṭhi kuto te evarūpā kālakaṇṇī laddhā, kiṃ sakalajambūdīpe aññā dārikā natthī"ti seṭṭhiṃ paribhāsiṃsu. So "ācariyā jānitvā vā kataṃ hotu ajānitvā vā, ahamettha jānissāmī"ti acelake uyyojetvā subhaddāya santikaṃ gantvā "amma kasmā evarūpaṃ akāsi, kasmā arahante lajjāpesī"ti āha. Tāta arahantā nāma na evarūpā hontīti. Atha naṃ so āha:-

"kīdisā samaṇā tuyhaṃ bāḷhaṃ kho ne pasaṃsasi

kiṃsīlā kiṃsamācārā tamme akkhāhi pucchitā"ti.