@maggasaṇṭhitā 4 Sī. ekākiyā, cha.Ma. ekakiyā

Evañca pana vatvā seṭṭhissa purato ṭhitā tiṇṇaṃ ratanānaṃ guṇaṃ kathesi. Seṭṭhī tassā vacanaṃ sutvā "yadi evaṃ, tava samaṇe ānetvā maṅgalaṃ karomā"ti. Sā pucchi "kadā karissatha tātā"ti. Seṭṭhī cintesi "katipāhaccayenāti vutte dūte pesetvā pakkosāpeyyā"ti. Atha naṃ "sve ammā"ti āha. Sā sāyaṇhasamaye upari pāsādaṃ āruyha mahantaṃ pupphasamuggaṃ gahetvā satthu guṇe anussaritvā aṭṭha pupphamuṭṭhiyo dasabalassa vissajjetvā añjaliṃ paggayha namassamānā aṭṭhāsi. Evañca avaca "bhagavā sve pañcahi bhikkhusatehi saddhiṃ mayhaṃ bhikkhaṃ gaṇhathā"ti. Tāni pupphāni gantvā dasabalassa matthake vitānaṃ hutvā aṭṭhaṃsu. Satthā āvajjento taṃ kāraṇaṃ addasa. Dhammadesanāpariyosāne anāthapiṇḍikamahāseṭṭhī dasabalaṃ vanditvā "sve bhante pañcahi bhikkhusatehi saddhiṃ mama gehe bhikkhaṃ gaṇhathā"ti āha. Cūḷasubhaddāya nimantitamha seṭṭhīti. Na bhante kañci āgataṃ passāmāti. Āma seṭṭhi, santā pana upāsikā dūre yojanasahassamatthakepi ṭhitā himavanto viya paññāyatīti vatvā:-

"dūre santo pakāsenti himavantova pabbato

asantettha na dissanti rattiṃ khittā yathā sarā"ti imaṃ gāthamāha. Anāthapiṇḍiko "bhante mama dhītu saṅgahaṃ karothā"ti vanditvā pakkāmi.