@3 cha.Ma. tathāgato 4 cha.Ma. taṃ

@5 Ma. taṃ mamassa, cha. taṃpassa 6 ka. diṭṭhā 7 cha.Ma. ayaṃ pāṭho na dissati Evampi taṇhādīhi maññanāhi na maññati. Daṭṭhabbaṃ na maññatīti "mahājanena diṭṭhaṃ passāmī"ti evampi tāhi maññanāhi na maññati. Daṭṭhabbañhi diṭṭhampi hotiyeva. Evarūpāni hi vacanāni tīsupi kālesu labbhanti, tena tesaṃ attho vutto. Daṭṭhāraṃ na maññatīti passitāraṃ ekasattaṃ nāma tāhi maññanāhi na maññatīti attho. Sesaṭṭhānesupi imināva nayena attho veditabbo. Iminā ettakena ṭhānena suññatābhūmi nāma kathitā.

Iti kho bhikkhaveti evaṃ kho bhikkhave. Tādisova tādīti tādi nāma ekasadisatā. Tathāgato ca yādiso lābhādīsu, tādisova alābhādīsu. Tena vuttaṃ "lābhepi tādi, alābhepi tādi. Yasepi tādi, ayasepi tādi. Nindāyapi tādi, pasaṃsāyapi tādi. Sukhepi tādi, dukkhepi tādī"ti. Imāya tāditāya tādi. Tamhā ca pana tādimhāti tato tathāgatatādito añño uttaritaro vā paṇītataro vā tādi natthīti ettāvatā tādibhūmi nāma kathitā. Imāhi pañcahi bhūmīhi desanaṃ nibbaṭṭentassa pañcasu ṭhānesu mahāpaṭhavī sakkhibhāvena akampittha. Desanāpariyosāne te pañcasate adhunā pabbajite kulaputte ādiṃ katvā taṇṭhānaṃ sampattānaṃ devamanussānaṃ caturāsītipāṇasahassāni amatapānaṃ piviṃsu.