๔. มหาจุนทสูตร

4. Mahācundasuttavaṇṇanā

Catutthe cetīsūti cetiraṭṭhe. Sañjātiyanti 1- evaṃnāmake nigame. Mahācundoti dhammasenāpatissa kaniṭṭhabhātiko. Dhamme yogo anuyogo etesanti dhammayogā. Dhammakathikānaṃ etaṃ nāmaṃ. Jhāyantīti jhāyī. Apasādentīti ghaṭṭenti khipanti. 2- Jhāyantīti cintenti. Pajjhāyantītiādīni upasaggavasena vaḍḍhitāni. Kiñhime jhāyantīti kinnāma ime jhāyanti. Kintime 3- jhāyantīti kimatthaṃ ime jhāyanti. Kathañhime jhāyantīti kena kāraṇena ime jhāyanti. Amataṃ dhātuṃ kāyena phusitvā viharantīti maraṇavirahitaṃ nibbānadhātuṃ sandhāya kammaṭṭhānaṃ gahetvā viharantā anukkamena taṃ nāmakāyena phusitvā viharanti. Gambhīraatthapadanti guḷhaṃ paṭicchannaṃ khandhadhātuāyatanādiatthaṃ. Paññāya ativijjha passantīti saha vipassanāya maggapaññāya ativijjhitvā 4- passanti. Imasmiṃ pana atthe sammasanapaṭivedhapaññāpi uggahaparipucchāpaññāpi vaṭṭatiyevāti.