๗. อสปฺปุริสทานสุตฺตวณฺณนา

[๑๔๗] สตฺตเม อสกฺกจฺจํ ทานํ ๔- เทตีติ น สกฺกริตฺวา สุจึ กตฺวา เทติ. อจิตฺตีกตฺวา เทตีติ อจิตฺตีกาเรน อคารววเสน เทติ. อปวิฏฺฐํ ๕- เทตีติ น นิรนฺตรํ เทติ, อถวา ฉฑฺเฑตุกาโม วิย เทติ. อนาคมนทิฏฺฐิโก เทตีติ กตสฺส ๖- นาม ผลํ อาคมิสฺสตีติ เอวํ อาคมนทิฏฺฐึ น อุปฺปาเทตฺวา เทติ.

สุกฺกปกฺเข จิตฺตีกตฺวา เทตีติ เทยฺยธมฺเม จ ทกฺขิเณยฺเยสุ จ จิตฺตีการํ อุปฏฺฐเปตฺวา เทติ. ตตฺถ เทยฺยธมฺมํ ปณีตํ โอชวนฺตํ กตฺวา เทนฺโต เทยฺยธมฺเม จิตฺตีการํ อุปฏฺฐเปติ นาม. ปุคฺคลํ วิจินิตฺวา เทนฺโต ทกฺขิเณยฺเยสุ จิตฺตีการํ อุปฏฺฐเปติ นาม. สหตฺถา เทตีติ อาณตฺติยา ปรหตฺเถน อทตฺวา "อนมตคฺเค สํสาเร วิจรนฺเตน เม หตฺถปาทานํ อลทฺธกาลสฺส ปมาณํ นาม นตฺถิ, วฏฺฏโมกฺขํ ภวนิสฺสรณํ กริสฺสามี"ติ สหตฺเถเนว เทติ. อาคมนทิฏฺฐิโกติ "อนาคตภาวสฺส ปจฺจโย ภวิสฺสตี"ติ กมฺมญฺจ วิปากญฺจ สทฺทหิตฺวา เทตีติ.