๔. มหาจุนฺทสุตฺตวณฺณนา

[๔๖] จตุตฺเถ เจตีสูติ เจติรฏฺเฐ. สญฺชาติยนฺติ ๑- เอวํนามเก นิคเม. มหาจุนฺโทติ ธมฺมเสนาปติสฺส กนิฏฺฐภาติโก. ธมฺเม โยโค อนุโยโค เอเตสนฺติ ธมฺมโยคา. ธมฺมกถิกานํ เอตํ นามํ. ฌายนฺตีติ ฌายี. อปสาเทนฺตีติ ฆฏฺเฏนฺติ ขิปนฺติ. ๒- ฌายนฺตีติ จินฺเตนฺติ. ปชฺฌายนฺตีติอาทีนิ อุปสคฺควเสน วฑฺฒิตานิ. กิญฺหิเม ฌายนฺตีติ กินฺนาม อิเม ฌายนฺติ. กินฺติเม ๓- ฌายนฺตีติ กิมตฺถํ อิเม ฌายนฺติ. กถญฺหิเม ฌายนฺตีติ เกน การเณน อิเม ฌายนฺติ. อมตํ ธาตุํ กาเยน ผุสิตฺวา วิหรนฺตีติ มรณวิรหิตํ นิพฺพานธาตุํ สนฺธาย กมฺมฏฺฐานํ คเหตฺวา วิหรนฺตา อนุกฺกเมน ตํ นามกาเยน ผุสิตฺวา วิหรนฺติ. คมฺภีรอตฺถปทนฺติ คุฬฺหํ ปฏิจฺฉนฺนํ ขนฺธธาตุอายตนาทิอตฺถํ. ปญฺญาย อติวิชฺฌ ปสฺสนฺตีติ สห วิปสฺสนาย มคฺคปญฺญาย อติวิชฺฌิตฺวา ๔- ปสฺสนฺติ. อิมสฺมึ ปน อตฺเถ สมฺมสนปฏิเวธปญฺญาปิ อุคฺคหปริปุจฺฉาปญฺญาปิ วฏฺฏติเยวาติ.