๑๐. มหานามสุตฺตวณฺณนา

[๑๐] ทสเม มหานาโมติ ทสพลสฺส จูฬปิตุปุตฺโต เอโก สกฺยราชา. เยน ภควา เตนุปสงฺกมีติ ภุตฺตปาตราโส หุตฺวา ทาสปริชนปริวุโต คนฺธมาลาทีนิ คาหาเปตฺวา ยตฺถ สตฺถา, ตตฺถ อคมาสิ. อริยผลํ อสฺส อาคตนฺติ อาคตผโล. สิกฺขาตฺตยสาสนํ เอเตน วิญฺญาตนฺติ วิญฺญาตสาสโน. อิติ อยํ ราชา "โสตาปนฺนสฺส นิสฺสยวิหารํ ปุจฺฉามี"ติ ปุจฺฉนฺโต เอวมาห.

เนวสฺส ราคปริยุฏฺฐิตนฺติ น อุปฺปชฺชมาเนน ราเคน อุฏฺฐหิตฺวา คหิตํ. อุชุคตนฺติ พุทฺธานุสฺสติกมฺมฏฺฐาเน อุชุกเมว คตํ. ตถาคตํ อารพฺภาติ ตถาคตคุเณ อารพฺภ. อตฺถเวทนฺติ อฏฺฐกถํ นิสฺสาย อุปฺปนฺนํ ปีติปาโมชฺชํ. ธมฺมเวทนฺติ ปาลึ นิสฺสาย อุปฺปนฺนํ ปีติปาโมชฺชํ. ธมฺมูปสญฺหิตนฺติ ปาลิญฺจ อฏฺฐกถญฺจ