7. Vapakāsasuttavaṇṇanā

[127] Sattame nālaṃ saṃghamhā vapakāsitunti saṃghato nikkhamitvā ekako vasituṃ na yutto. Kāmaṃ cesa saṃghamajjhepi vasituṃ ayuttova asaṃghasobhanatāya, ovādānusāsanipaṭibaddhattā pana nippariyāyeneva saṃghamhā vapakāsituṃ na yutto. Alaṃ saṃghamhā vapakāsitunti cātuddisattā saṃghamhā nikkhamma ekakova vasituṃ yutto, saṃghasobhanattā pana saṃghepi vasituṃ yuttoyeva. Aṭṭhamaṃ uttānatthameva.