9. Udāyīsuttavaṇṇanā

[159] Navame anupubbikathaṃ kathessāmīti dānānantaraṃ sīlaṃ, sīlānantaraṃ sagganti evaṃ desanānupubbikaṃ vā, yaṃ yaṃ suttapadaṃ vā gāthāpadaṃ vā nikkhittaṃ hoti, tassa tassa anurūpaṃ kathaṃ vā kathessāmīti cittaṃ upaṭṭhapetvā paresaṃ dhammo desetabbo. Pariyāyadassāvīti tassa tassa atthassa taṃ taṃ kāraṇaṃ dassento. Kāraṇañhi idha pariyāyoti vuttaṃ. Anuddayataṃ paṭiccāti "mahāsambādhappatte satte sambādhato mocessāmī"ti anukampaṃ āgamma. Na āmisantaroti na āmisahetuko, attano catuppaccayalābhaṃ anāsiṃsantoti attho. Attānañca parañca anupahaccāti attukkaṃsanaparavambhanādivasena attānañca parañca guṇūpaghātena anupahantvā.