7. Codanāsuttavaṇṇanā

[167] Sattame codakenāti vatthusandassanā āpattisandassanā saṃvāsappaṭikkhepo sāmīcipaṭikkhepoti catūhi codanāvatthūhi codayamānena. Kālena vakkhāmi no akālenāti ettha cuditakassa kālo kathito, na codakassa. Paraṃ codentena hi parisamajjhe vā uposathapavāraṇagge vā āsanasālābhojanasālādīsu vā na codetabbaṃ, divāṭṭhāne nisinnakāle "karotāyasmā okāsaṃ, ahaṃ āyasmantaṃ vattukāmo"ti evaṃ okāsaṃ kāretvā codetabbaṃ. Puggalepi jane upaparikkhitvā yo lolapuggalo abhūtaṃ vatvā bhikkhūnaṃ ayasaṃ āropeti, so okāsakammaṃ vināpi codetabbo. Bhūtenāti tacchena sabhāvena. Saṇhenāti maṭṭhena mudukena. Atthasañhitenāti atthakāmatāya hitakāmatāya upetena. Avippaṭisāro upadahitabboti amaṅkubhāvo uppādetabbo. Alante avippaṭisārāyāti yuttante amaṅkubhāvāya. Sesamettha uttānatthamevāti. Aṭṭhamaṃ heṭṭhā vuttanayattā pākaṭameva.