2. Dutiyapaṇṇāsaka

6. Mahāvagga

1. Soṇasuttavaṇṇanā

[55] Chaṭṭhassa paṭhame soṇoti sukhumālasoṇatthero. Sītavaneti evaṃnāmake susāne. Tasmiṃ kira paṭipāṭiyā pañca saṅkamanasālāsatāni māpitāni, tesu thero attano sappāyasaṅkamanaṃ gahetvā samaṇadhammaṃ karoti. Tassa āraddhaviriyassa hutvā caṅkamato pādatalāni bhijjiṃsu, jaṇṇūhi caṅkamato jaṇṇukānipi hatthatalānipi bhijjiṃsu, chiddāni ahesuṃ. Evaṃ āraddhaviriyo viharanto okāsanimittamattakampi dassetuṃ nāsakkhi. Tassa viriyena kilamitakāyassa caṅkamanakoṭiyaṃ pāsāṇaphalake nisinnassa yo vitakko udapādi, taṃ dassetuṃ athakho āyasmatotiādi vuttaṃ. Tattha āraddhaviriyāti paripuṇṇapaggahitaviriyā. Na anupādāya āsavehi cittaṃ vimuccatīti sace hi ahaṃ ugghaṭitaññū vā assaṃ vipacitaññū vā neyyo vā, nūna me cittaṃ vimucceyya. Addhā panasmi padaparamo, yena na me cittaṃ vimuccatīti sanniṭṭhānaṃ katvā saṃvijjanti kho panātiādīni cintesi. Tattha bhogāti upayogatthe paccattaṃ.