5. Dārukammikasuttavaṇṇanā

[59] Pañcame dārukammikoti dāruvikkayena pavattitājīvo eko upāsako. Kāsikacandananti saṇhacandanaṃ. Aṅgenāti aguṇaṅgena, sukkapakkhe guṇaṅgena. Nemantanikoti nimantanaṃ gaṇhanako. Saṃghe dānāni dassāmīti bhikkhusaṃghassa dassāmi. So evaṃ vatvā satthāraṃ abhivādetvā pakkāmi. Athassa aparabhāge pañcasatā kulupakabhikkhū gihibhāvaṃ pāpuṇiṃsu. So "kulupakabhikkhū te vibbhantā"ti vutte "kiṃ ettha mayhan"ti vatvā cittuppādavemattamattampi na akāsi. Idaṃ sandhāya satthā saṃghe te dānaṃ dadato cittaṃ pasīdissatīti āha.