2. Cundīsuttavaṇṇanā

[32] Dutiye pañcahi rathasatehīti bhuttapātarāsā pitu santikaṃ pesetvā pañca rathasatāni yojāpetvā tehi parivutāti attho. Upasaṅkamīti bhātarā saddhiṃ pavattitapañhāsākacchaṃ pucchissāmīti gandhamālācuṇṇādīni ādāya upasaṅkami. Yadeva so hotīti yadāeva so hoti. Athavā yoeva so hoti. Ariyakantāni sīlānīti maggaphalasampayuttāni sīlāni. Tāni hi ariyānaṃ kantāni hontīti, bhavantarepi na pariccajanti. Sesaṃ catukkanipāte aggappasādasutte vuttanayeneva veditabbaṃ.