14. 4. Rājavagga

1. Paṭhamacakkānuvattanasuttavaṇṇanā

[131] Catutthassa paṭhame dhammenāti dasakusaladhammena. Cakkanti āṇācakkaṃ. Atthaññūti rajjatthaṃ jānāti. Dhammaññūti paveṇidhammaṃ jānāti. Mattaññūti daṇḍe vā balismiṃ vā pamāṇaṃ jānāti. Kālaññūti rajjasukhānubhavanakālaṃ vinicchayakaraṇakālaṃ janapadacārikakālañca jānāti. Parisaññūti ayaṃ parisā khattiyaparisā, ayaṃ brāhmaṇaparisā vessaparisā suddaparisā samaṇaparisāti jānāti.