@3 cha.Ma. apadissatīti 4 Sī. ādiyyamukhoti, Ma. ādiyamukhoti Kujjhitvā "jānāmahaṃ tayā katakammaṃ, ettakaṃ addhānaṃ ahaṃ kiṃ karonto vasiṃ, nanu tuyhameva katākataṃ vīmaṃsanto"tiādīni vattā hoti. Atha itaro "addhā koci mayhaṃ doso bhavissatī"ti kiñci paṭippharituṃ na sakkoti. Taṃ khippaññeva adhimuccito hotīti taṃ vaṇṇaṃ vā avaṇṇaṃ vā sīghameva saddahati. Saddahanaṭṭhena hi ādānena esa ādiyanamukhoti vutto. Ādhīyamukhoti pāliyā pana ṭhapitamukhoti attho. Magge khataāvāṭo viya āgatāgataṃ udakaṃ vaṇṇaṃ vā avaṇṇaṃ vā saddahanavasena sampaṭicchituṃ ṭhapitamukhoti vuttaṃ hoti.

Ittarasaddhoti parittasaddho. Kusalākusale dhamme na jānātītiādīsu kusale dhamme "ime kusalā"ti na jānāti, akusale dhamme "ime akusalā"ti na jānāti. Tathā sāvajje sadosadhamme "ime sāvajjā"ti, anavajje ca niddosadhamme "ime anavajjā"ti, hīne hīnāti, paṇīte paṇītāti. Kaṇhasukkasappaṭibhāgeti "ime kaṇhā sukke paṭibāhitvā ṭhitattā sappaṭibhāgā nāma, ime ca sukkā kaṇhe paṭibāhitvā ṭhitattā sappaṭibhāgā"ti na jānāti.