1. Paṭhamapaṇṇāsaka

1. Sekhabalavagga 1. Saṅkhittasuttavaṇṇanā

[1] Pañcakanipātassa paṭhame sattannaṃ sekhānaṃ balānīti sekhabalāni. Saddhābalādīsu assaddhiyena na kampatīti saddhābalaṃ. Ahirikena na kampatīti hiribalaṃ. Anottappena na kampatīti ottappabalaṃ. Kosajjena na kampatīti viriyabalaṃ. Avijjāya na kampatīti paññābalaṃ. Tasmāti yasmā imāni sattannaṃ sekhānaṃ balāni, tasmā.