23. 3. Dīghacārikavagga

1. Paṭhamadīghacārikasuttavaṇṇanā

[221] Tatiyassa paṭhame anavaṭṭhacārikanti avavaṭṭhitacārikaṃ. Sutaṃ na pariyodapetīti yampissa sutaṃ atthi, taṃ pariyodapetuṃ na sakkoti. Sutenekaccena avisārado hotīti thokathokena sutena vijjamānenāpi ñāṇena somanassappatto na hoti. Samavaṭṭhacāreti samavaṭṭhitacāre. Dutiyaṃ uttānatthameva.