[1] Chakkanipātassa paṭhame idha bhikkhave bhikkhūti bhikkhave imasmiṃ sāsane bhikkhu. Neva sumano hoti na dummanoti iṭṭhārammaṇe rāgasahagatena somanassena na sumano vā aniṭṭhārammaṇe dosasahagatena domanassena na dummano vā hoti. Upekkhako viharati sato sampajānoti majjhattārammaṇe asamavekkhaṇena aññānupekkhāya upekkhakabhāvaṃ anāpajjitvā sato sampajāno hutvā ārammaṇe majjhatto viharati. Imasmiṃ sutte khīṇāsavassa satatavihāro kathito.