Imassa panatthassa āvibhāvanatthaṃ madhurambabījaṃ ropetvā samantā mariyādaṃ bandhitvā kālānukālaṃ udakaṃ āsiñcitvā kālānukālaṃ mūlāni sodhetvā kālānukālaṃ patitapāṇake hāretvā kālānukālaṃ makkaṭakajālaṃ luñacitvā ambaṃ paṭijagganto puriso dassetabbo. Tassa hi purimassa madhurambabījaropanaṃ viya vipassanāsammādiṭṭhi daṭṭhabbā, mariyādabandhanaṃ viya sīlena anuggaṇhaṇaṃ, udakāsecanaṃ viya sutena anuggaṇhaṇaṃ, mūlaparisodhanaṃ sākacchāya anuggaṇhaṇaṃ, pāṇakaharaṇaṃ viya jhānavipassanānaṃ pāripanthikasodhanavasena samathānuggaṇhaṇaṃ, makkaṭakajālaluñcanaṃ viya balavavipassanānuggaṇhaṇaṃ, evaṃ anuggahitassa rukkhassa khippameva vaḍḍhitvā phalappadānaṃ viya imehi sīlādīhi anuggahitāya mūlāya sammādiṭṭhiyā khippameva maggavasena vaḍḍhitvā cetovimuttiphalapaññāvimuttiphalappadānaṃ veditabbaṃ.