11. Dārukkhandhasuttavaṇṇanā

[41] Ekādasame cetovasippattoti cittavasibhāvaṃ patto. Paṭhavītveva adhimucceyyāti thaddhākāraṃ paṭhavīdhātūti sallakkheyya. Yaṃ nissāyāti yaṃ vijjamānaṃ thaddhākāraṃ paṭhavīdhātuṃ nissāya amuṃ dārukkhandhaṃ paṭhavītveva adhimucceyya, sā ettha paṭhavīdhātu atthīti. Iminā nayena sesapadānipi veditabbāni. Yatheva hi tasmiṃ thaddhākārā paṭhavīdhātu atthi, evaṃ yūsākārā āpodhātu, uṇhākārā tejodhātu, vitthambhanākārā vāyodhātu, rattavaṇṇamhi sare padumapupphavaṇṇā subhadhātu, pūtibhūte cuṇṇe ceva pheggupapaṭikāsu ca amanuññavaṇṇā asubhadhātu, taṃ nissāyeva amuṃ dārukkhandhaṃ asubhantveva adhimucceyya sallakkheyyāti. Imasmiṃ sutte missakavihāro nāma kathito.