Pātaruhosīti therassa cittavāraṃ ñatvā "ayaṃ soṇo ajja sītavane padhānabhūmiyaṃ nisinno imaṃ vitakkaṃ vitakketi, gantvāssa vitakkaṃ sahoṭṭhaṃ gaṇhitvā vīṇopamaṃ kammaṭṭhānaṃ kathessāmī"ti sammukhe pākaṭo ahosi. Paññatte āsaneti padhānikabhikkhū attano vasanaṭṭhāne ovadituṃ āgatassa buddhassa bhagavato nisīdanatthaṃ yathālābhena āsanaṃ paññāpetvāva padhānaṃ karonti, aññaṃ alabhamānā purāṇapaṇṇānipi santharitvā upari saṅghāṭiṃ paññāpenti. Theropi āsanaṃ paññāpetvāva padhānaṃ akāsi. Taṃ sandhāya vuttaṃ "paññatte āsane"ti.

@3 cha.Ma. cittācāraṃ 4 cha.Ma. sahotthaṃ 5 cha.Ma. pamukhe

Taṃ kiṃ maññasīti satthā "imassa bhikkhuno avasesakammaṭṭhānehi attho natthi, ayaṃ gandhabbasippe cheko ciṇṇavasī, attano visaye kathiyamānaṃ khippameva sallakkhessatī"ti vīṇopamaṃ kathetuṃ "taṃ kiṃ maññasī"tiādimāha. Vīṇāya tantissare kusalatā nāma vīṇāya vādanakusalatā, so ca tattha kusalo. Mātāpitaro hissa "amhākaṃ putto aññaṃ sippaṃ sikkhanto kāyena kilamissati, idaṃ pana sayane nisinneneva sakkā uggaṇhitun"ti gandhabbasippameva uggaṇhāpesuṃ. Tassa:-