Sā bhagavantaṃ vanditvā "bhavābhavābhinibbattiyaṃ me sati paritassanajīvitaṃ nāma mā hotu, ayaṃ sumanamālā viya nibbattanibbattaṭṭhāne piyāva homi, nāmena ca sumanāyevā"ti paṭṭhanamakāsi, satthārā "sukhinī hohī"ti vuttā vanditvā padakkhiṇaṃ katvā pakkāmi.
Bhagavāpi senāpatissa gehaṃ gantvā paññattāsane nisīdi. Senāpati yāguṃ gahetvā upagacchi, satthā hatthena pattaṃ pidahi. Nisinno bhante bhikkhusaṃghoti. Atthi no eko antarāmagge piṇḍapāto laddhoti. Mālaṃ apanetvā piṇḍapātaṃ addasa. Cūḷupaṭṭhāko āha "sāmi mālāti maṃ vatvā mātugāmo vañcesī"ti. Pāyāso bhagavantaṃ ādiṃ katvā sabbabhikkhūnaṃ pahosi. Senāpati attano deyyadhammaṃ adāsi. Satthā bhattakiccaṃ katvā maṅgalaṃ vatvā pakkāmi. Senāpati "kā nāma sā piṇḍapātaṃ adāsī"ti pucchi. Seṭṭhidhītā sāmīti. Sappaññā itthī, evarūpāya ghare vasantiyā na purisassa saggasampatti nāma dullabhāti taṃ ānetvā jeṭṭhakaṭṭhāne ṭhapesi.
Sāpi mātugehe ca senāpatigehe ca dhanaṃ gahetvā yāvatāyukaṃ tathāgatassa dānaṃ datvā puññāni katvā tato cutā kāmāvacaradevaloke nibbatti. Nibbattakkhaṇeyevassā jānuppamāṇena odhinā sakaladevalokaṃ pūrayamānaṃ sumanavassaṃ vassi. Devatā "ayaṃ attanāva attano nāmaṃ gahetvā āgatā"ti "sumanā devadhītā"tvevassā nāmaṃ akaṃsu. Sā ekūnanavutikappe devesu ca manussesu ca saṃsarantī nibbattanibbattaṭṭhāne avijahitasumanavassā "sumanā sumanā"tveva nāmā ahosi. Imasmiṃ pana kāle kosalarañño aggamahesiyā kucchimhi paṭisandhiṃ gaṇhi. Tāpi pañcasatā kumārikā taṃdivasaṃyeva tasmiṃ tasmiṃ kule paṭisandhiṃ gahetvā ekadivaseyeva sabbā mātukucchito nikkhamiṃsu. Taṃkhaṇaññeva jānuppamāṇena odhinā