4. Manāpadāyīsuttavaṇṇanā

[44] Catutthe uggoti guṇehi uggatattā evaṃladdhanāmo. Sālapupphakaṃ khādanīyanti catumadhurayojitena sālipiṭṭhena kataṃ sālapupphasadisaṃ khādanīyaṃ. Tañhi paññāyamānaṃ vaṇṭapattakesaraṃ katvā jīrakādisambhārayutte sappimhi pacitvā sappimpi vinivaṭṭetvā kolumbe pūretvā gandhavāsaṃ gāhāpetvā sajjitvā ṭhapitaṃ hoti. Tassa yāguṃ pivitvā nisinnassa bhagavato antarābhatte dātukāmo evamāha. Paṭiggahesi bhagavāti desanāmattametaṃ, upāsako pana taṃ bhagavato ca pañcannañca bhikkhusatānaṃ adāsi. Yathā ca etaṃ, evaṃ sūkaramaṃsādīnipi. Tattha sampannakolakanti sampannabadaraṃ. Sūkaramaṃsanti madhurarasehi badarehi saddhiṃ jīrakādisambhārehi yojetvā pakkaṃ ekasaṃvaccharikaṃ sūkaramaṃsaṃ. Nibbattatelakanti vinivattitatelaṃ. Nāliyasākanti saddhiṃ sālipiṭṭhena madditvā jīrakādisaṃyutte sappimhi pacitvā catumadhurena yojetvā vāsaṃ gāhāpetvā ṭhapitaṃ nāḷiyasākaṃ. Netaṃ bhagavato kappatīti ettha akappiyaṃ upādāya kappiyampi na kappatīti vuttaṃ, seṭṭhī pana sabbaṃpi taṃ āharāpetvā rāsiṃ katvā yaṃ yaṃ akappiyaṃ, taṃ taṃ antarāpaṇaṃ pahiṇitvā kappiyaṃ upabhogaparibhogabhaṇḍaṃ adāsi. Candanaphalakaṃ nātimahantaṃ dīghato aḍḍhateyyaratanaṃ, tiriyaṃ diyaḍḍharatanaṃ, sāravarabhaṇḍattā pana mahagghaṃ ahosi. Bhagavā taṃ paṭiggahetvā khaṇḍākhaṇḍikaṃ chedāpetvā bhikkhūnaṃ añjanapiṃsanatthāya dāpesi.

@lañchetvā 4 cha.Ma. taṃ so 5 Sī. nibaddhatelakanti 6 ka. nāḷiyāsākanti