TIPITAKA Volume 22 : PALI ROMAN Sutta Pitaka Vol 14 : Sutta. Aṅ. (3): pañcaka-chakkanipātā Tikaṇḍakīvaggo pañcamo

[141] Pañcime bhikkhave puggalā santo saṃvijjamānā lokasmiṃ katame pañca datvā avajānāti saṃvāsena avajānāti ādeyyamukho 4- hoti loḷo hoti mando momūho hoti . kathañca bhikkhave puggalo datvā avajānāti idha bhikkhave puggalo puggalassa deti cīvarapiṇḍapātasenāsanagilānapaccayabhesajjaparikkhāraṃ tassa evaṃ hoti ahaṃ demi ayaṃ paṭiggaṇhātīti tamenaṃ datvā avajānāti evaṃ kho bhikkhave puggalo datvā avajānāti . kathañca bhikkhave puggalo saṃvāsena avajānāti idha bhikkhave puggalo puggalena saddhiṃ saṃvasati dve vā tīṇi vā vassāni tamenaṃ saṃvāsena avajānāti evaṃ kho bhikkhave puggalo saṃvāsena avajānāti . kathañca bhikkhave puggalo @Footnote: 1 Ma. ceva . 2 Ma. bhattādo . 3 Ma. akkhamo ca sotena cāti. yu ... sotarā @cāti . 4 Po. Ma. ādheyyamukho. Yu. ādiya ... Sī. ādīya .... Ādeyyamukho hoti idha bhikkhave ekacco puggalo parassa vaṇṇe vā avaṇṇe vā bhāsiyamāne taṃ khippaññeva adhimuccito 1- hoti evaṃ kho bhikkhave puggalo ādeyyamukho hoti . kathañca bhikkhave puggalo loḷo 2- hoti idha bhikkhave ekacco puggalo ittarasaddho hoti ittarabhatti 3- ittarapemo ittarapasādo evaṃ kho bhikkhave puggalo loḷo hoti . kathañca bhikkhave puggalo mando momūho hoti idha bhikkhave ekacco puggalo kusalākusale dhamme na jānāti sāvajjānavajje dhamme na jānāti hīnapaṇīte dhamme na jānāti kaṇhasukkasappaṭibhāge dhamme na jānāti evaṃ kho bhikkhave puggalo mando momūho hoti . ime kho bhikkhave pañca puggalā santo saṃvijjamānā lokasminti.