TIPITAKA Volume 22 : PALI ROMAN Sutta Pitaka Vol 14 : Sutta. Aṅ. (3): pañcaka-chakkanipātā Āvāsikavaggo catuttho

[231] Pañcahi bhikkhave dhammehi samannāgato āvāsiko bhikkhu abhāvanīyo hoti katamehi pañcahi na ākappasampanno hoti na vattasampanno na bahussuto hoti na sutadharo na paṭisallekhitā hoti na paṭisallānārāmo na kalyāṇārāmo 1- na kalyāṇavāco hoti na kalyāṇavākkaraṇo duppañño hoti jaḷo eḷamūgo imehi kho bhikkhave pañcahi dhammehi samannāgato āvāsiko bhikkhu abhāvanīyo hoti . pañcahi bhikkhave dhammehi samannāgato āvāsiko bhikkhu bhāvanīyo hoti katamehi pañcahi ākappasampanno hoti vattasampanno bahussuto hoti sutadharo paṭisallekhitā hoti paṭisallānārāmo kalyāṇārāmo 1- kalyāṇavāco hoti kalyāṇavākkaraṇo paññavā hoti ajaḷo aneḷamūgo imehi kho bhikkhave pañcahi dhammehi samannāgato āvāsiko bhikkhu bhāvanīyo hotīti.