TIPITAKA Volume 22 : PALI ROMAN Sutta Pitaka Vol 14 : Sutta. Aṅ. (3): pañcaka-chakkanipātā

[364] 93 Chayimāni bhikkhave abhabbaṭṭhānāni katamāni cha abhabbo diṭṭhisampanno puggalo kañci saṅkhāraṃ niccato upagantuṃ abhabbo diṭṭhisampanno puggalo kañci saṅkhāraṃ sukhato upagantuṃ abhabbo diṭṭhisampanno puggalo kañci dhammaṃ attato upagantuṃ abhabbo diṭṭhisampanno puggalo anantariyakammaṃ kātuṃ abhabbo diṭṭhisampanno puggalo kotuhalamaṅgalena suddhiṃ paccāgantuṃ abhabbo diṭṭhisampanno puggalo ito bahiddhā dakkhiṇeyyaṃ gavesituṃ imāni kho bhikkhave cha abhabbaṭṭhānānīti.