TIPITAKA Volume 22 : PALI ROMAN Sutta Pitaka Vol 14 : Sutta. Aṅ. (3): pañcaka-chakkanipātā

[76] Pañcime bhikkhave yodhājīvā santo saṃvijjamānā lokasmiṃ katame pañca idha bhikkhave ekacco yodhājīvo asicammaṃ gahetvā dhanukalāpaṃ sannayhitvā viyūḷhaṃ saṅgāmaṃ otarati so tasmiṃ saṅgāme ussahati vāyamati tamenaṃ ussahantaṃ vāyamantaṃ pare hananti pariyāpādenti evarūpopi bhikkhave idhekacco yodhājīvo hoti ayaṃ bhikkhave paṭhamo yodhājīvo santo saṃvijjamāno lokasmiṃ. {76.1} Puna caparaṃ bhikkhave idhekacco yodhājīvo asicammaṃ gahetvā dhanukalāpaṃ sannayhitvā viyūḷhaṃ saṅgāmaṃ otarati so tasmiṃ saṅgāme ussahati vāyamati tamenaṃ ussahantaṃ vāyamantaṃ pare upalikkhanti tamenaṃ apanenti apanetvā ñātakānaṃ nenti so ñātakehi nīyamāno appatvā ñātake antarāmagge kālaṃ karoti evarūpopi bhikkhave idhekacco yodhājīvo hoti ayaṃ bhikkhave dutiyo yodhājīvo santo saṃvijjamāno lokasmiṃ. {76.2} Puna caparaṃ bhikkhave idhekacco yodhājīvo asicammaṃ gahetvā Dhanukalāpaṃ sannayhitvā viyūḷhaṃ saṅgāmaṃ otarati so tasmiṃ saṅgāme ussahati vāyamati tamenaṃ ussahantaṃ vāyamantaṃ pare upalikkhanti tamenaṃ apanenti apanetvā ñātakānaṃ nenti tamenaṃ ñātakā upaṭṭhahanti paricaranti so ñātakehi upaṭṭhahiyamāno paricariyamāno teneva ābādhena kālaṃ karoti evarūpopi bhikkhave idhekacco yodhājīvo hoti ayaṃ bhikkhave tatiyo yodhājīvo santo saṃvijjamāno lokasmiṃ. {76.3} Puna caparaṃ bhikkhave idhekacco yodhājīvo asicammaṃ gahetvā dhanukalāpaṃ sannayhitvā viyūḷhaṃ saṅgāmaṃ otarati so tasmiṃ saṅgāme ussahati vāyamati tamenaṃ ussahantaṃ vāyamantaṃ pare upalikkhanti tamenaṃ apanenti apanetvā ñātakānaṃ nenti tamenaṃ ñātakā upaṭṭhahanti paricaranti so ñātakehi upaṭṭhahiyamāno paricariyamāno vuṭṭhāti tamhā ābādhā evarūpopi bhikkhave idhekacco yodhājīvo hoti ayaṃ bhikkhave catuttho yodhājīvo santo saṃvijjamāno lokasmiṃ. {76.4} Puna caparaṃ bhikkhave idhekacco yodhājīvo asicammaṃ gahetvā dhanukalāpaṃ sannayhitvā viyūḷhaṃ saṅgāmaṃ otarati so taṃ saṅgāmaṃ abhivijinitvā vijitasaṅgāmo tameva saṅgāmasīsaṃ ajjhāvasati evarūpopi bhikkhave idhekacco yodhājīvo hoti ayaṃ bhikkhave pañcamo yodhājīvo santo saṃvijjamāno lokasmiṃ . ime kho bhikkhave pañca yodhājīvā santo saṃvijjamānā lokasmiṃ. {76.5} Evameva kho bhikkhave pañcime yodhājīvūpamā puggalā santo saṃvijjamānā bhikkhūsu katame pañca idha bhikkhave Bhikkhu aññataraṃ gāmaṃ vā nigamaṃ vā unissāya viharati so pubbaṇhasamayaṃ nivāsetvā pattacīvaramādāya tameva gāmaṃ vā nigamaṃ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṃvutehi indriyehi so tattha passati mātugāmaṃ dunnivatthaṃ vā duppārutaṃ vā tassa