ทานูปปัตติสูตร

35 Aṭṭhimā bhikkhave dānūpapattiyo . katamā aṭṭha idha bhikkhave ekacco dānaṃ deti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathaṃ padīpeyyaṃ so yaṃ deti taṃ paccāsiṃsati so passati khattiyamahāsāle vā brāhmaṇamahāsāle vā gahapatimahāsāle vā pañcahi kāmaguṇehi samappite samaṅgibhūte paricārayamāne tassa evaṃ hoti aho vatāhaṃ kāyassa bhedā parammaraṇā khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā sahabyataṃ upapajjeyyanti so taṃ cittaṃ padahati taṃ cittaṃ adhiṭṭhāti taṃ cittaṃ bhāveti tassa taṃ cittaṃ hīnedhimuttaṃ uttariṃ abhāvitaṃ [1]- kāyassa bhedā parammaraṇā khattiyamahāsālānaṃ vā brāhmaṇamahāsālānaṃ vā gahapatimahāsālānaṃ vā sahabyataṃ upapajjati tañca kho sīlavato vadāmi no dussīlassa ijjhati bhikkhave sīlavato cetopaṇidhi suddhattā 2- . idha pana bhikkhave ekacco @Footnote: 1 Ma. tatrūpapattiyā saṃvattati. evamīdisesu ṭhānesupi . 2 Ma. visuddhattā. @evamuparipi. Dānaṃ deti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathaṃ padīpeyyaṃ so yaṃ deti taṃ paccāsiṃsati tassa sutaṃ hoti cātummahārājikā devā dīghāyukā vaṇṇavanto sukhabahulāti tassa evaṃ hoti aho vatāhaṃ kāyassa bhedā parammaraṇā cātummahārājikānaṃ devānaṃ sahabyataṃ upapajjeyyanti so taṃ cittaṃ padahati taṃ cittaṃ adhiṭṭhāti taṃ cittaṃ bhāveti tassa taṃ cittaṃ hīnedhimuttaṃ uttariṃ abhāvitaṃ kāyassa bhedā parammaraṇā cātummahārājikānaṃ devānaṃ sahabyataṃ upapajjati tañca kho sīlavato vadāmi no dussīlassa ijjhati bhikkhave sīlavato cetopaṇidhi suddhattā. {125.1} Idha pana bhikkhave ekacco dānaṃ deti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathaṃ padīpeyyaṃ so yaṃ deti taṃ paccāsiṃsati tassa sutaṃ hoti tāvatiṃsā devā .pe. yāmā devā tusitā devā nimmānaratī devā paranimmitavasavattī devā dīghāyukā vaṇṇavanto sukhabahulāti tassa evaṃ hoti aho vatāhaṃ kāyassa bhedā parammaraṇā paranimmitavasavattīnaṃ devānaṃ sahabyataṃ upapajjeyyanti so taṃ cittaṃ padahati taṃ cittaṃ adhiṭṭhāti taṃ cittaṃ bhāveti tassa taṃ cittaṃ hīnedhimuttaṃ uttariṃ abhāvitaṃ kāyassa bhedā parammaraṇā paranimmitavasavattīnaṃ devānaṃ sahabyataṃ upapajjati tañca kho sīlavato vadāmi no dussīlassa ijjhati bhikkhave sīlavato cetopaṇidhi suddhattā . idha pana bhikkhave Ekacco dānaṃ deti samaṇassa vā brāhmaṇassa vā annaṃ pānaṃ vatthaṃ yānaṃ mālāgandhavilepanaṃ seyyāvasathaṃ padīpeyyaṃ so yaṃ deti taṃ paccāsiṃsati tassa sutaṃ hoti brahmakāyikā devā dīghāyukā vaṇṇavanto sukhabahulāti tassa evaṃ hoti aho vatāhaṃ kāyassa bhedā parammaraṇā brahmakāyikānaṃ devānaṃ sahabyataṃ upapajjeyyanti so taṃ cittaṃ padahati taṃ cittaṃ adhiṭṭhāti taṃ cittaṃ bhāveti tassa taṃ cittaṃ hīnedhimuttaṃ uttariṃ abhāvitaṃ kāyassa bhedā parammaraṇā brahmakāyikānaṃ devānaṃ sahabyataṃ upapajjati tañca kho sīlavato vadāmi no dussīlassa vītarāgassa no sarāgassa ijjhati bhikkhave sīlavato cetopaṇidhi vītarāgattā . imā kho bhikkhave aṭṭha dānūpapattiyoti