@๔ ฉ.ม. อทานสมฺมตานิ ๕ ฉ.ม. อยํ ปาโฐ น ทิสฺสติ

@๖ ฉ.ม. ทิฏฺฐมาเน ๗ ฉ.ม. อยํ สทฺโท น ทิสฺสติ

โย จ สตํ ทิฏฺฐิสมฺปนฺนานนฺติ เอตฺถ เอกสฺส สกทาคามิสฺส วเสน เอกุตฺตรสตํ โสตาปนฺเน กตฺวา โสตาปนฺนคณนา เวทิตพฺพา. อิมินา อุปาเยน สพฺพวาเรสุ เหฏฺฐา ๑- อาคเตน อนนฺตเรน สตคุณํ กตฺวา ปุคฺคลคณนา เวทิตพฺพา.

พุทฺธปฺปมุขนฺติ เอตฺถ สมฺมาสมฺพุทฺธํ สํฆตฺเถรํ กตฺวา นิสินฺโน สํโฆ พุทฺธปฺปมุโข สํโฆติ เวทิตพฺโพ. จาตุทฺทิสํ สํฆํ อุทฺทิสฺสาติ เอตฺถ จาตุทฺทิสํ สํฆํ อุทฺทิสฺส กตวิหาโร นาม ยตฺถ เจติยํ ปติฏฺฐิตํ โหติ, ธมฺมสฺสวนํ กริยติ, จตูหิ ทิสาหิ จ อนุทิสาหิ จ ภิกฺขู อาคนฺตฺวา อปฺปฏิปุจฺฉิตฺวาเยว ปาเท โธวิตฺวา กุญฺจิกาย ทฺวารํ วิวริตฺวา เสนาสนํ ปฏิชคฺคิตฺวา วสิตฺวา ยถาผาสุกํ คจฺฉนฺติ. โส อนฺตมโส จตุรตนิยา ปณฺณสาลาปิ โหติ, จาตุทฺทิสํ สํฆํ อุทฺทิสฺส กตวิหาโรเตฺวว วุจฺจติ.