๕. สามญฺญวคฺค

๑. สมฺพาธสุตฺตวณฺณนา

[๔๒] ปญฺจมสฺส ปฐเม อุทายีติ กาฬุทายิตฺเถโร. อวิทาติ ๒- อญฺญาสิ. ภูริเมธโสติ มหาปญฺโญ. โย ฌานมนุพุชฺฌิ ๓- พุทฺโธติ โย ฌานํ อพุชฺฌิ. ปฏิลีนนิสโภติ เอกีภาววเสน ปฏิลีโน เจว อุตฺตมฏฺเฐน จ นิสโภ. มุนีติ พุทฺธมุนิ. ปริยาเยนาติ เอเกน การเณน. กามสมฺพาธสฺส หิ อภาวมตฺเตเนว ๔- ปฐมชฺฌานํ โอกาสาธิคโม นาม, น สพฺพถา สพฺพํ. ตตฺรปตฺถิ ๕- สมฺพาโธติ ตสฺมึปิ ปฐมชฺฌาเน สติปิ ๖- สมฺพาโธ ปฏิปีฬนา ๗- อตฺถิเยว. ตตฺถปิตฺถีติปิ ๘- ปาโฐ. กิญฺจ ตตฺถ สมฺพาโธติ ตสฺมึ ปน ฌาเน กึ สมฺพาโธ นาม. อยเมตฺถ สมฺพาโธติ อยํ วิตกฺกวิจารานํ อนิรุทฺธภาโว สมฺพาโธ สมฺปีฬา นาม. อิมินา อุปาเยน สพฺพวาเรสุ อตฺโถ เวทิตพฺโพ. นิปฺปริยาเยนาติ น เอเกนากาเรน, อถโข อาสวกฺขโย นาม สพฺพ- สมฺพาธานํ ปหีนตฺตา สพฺเพน สพฺพํ เอโก ๙- โอกาสาธิคโม นามาติ.