อิทานิ ยสฺมา ตถาคตสฺส นคเร กมฺมํ นาม นตฺถิ, นครสทิสํ ปน อริยสาวกํ นครปริกฺขารสทิเส จ สตฺตธมฺเม จตุราหารสทิสานิ จ จตฺตาริ ฌานานิ ทสฺเสตฺวา เอกาทสสุ ฐาเนสุ อรหตฺตํ ปกฺขิปิตฺวา เทสนํ นิวฏฺเฏสฺสามีติ ๑- อยํ อุปมา อาคตา, ตสฺมา ตํ เทสนํ ปกาเสตุํ อิทํ เอวเมว โขติอาทิ อารทฺธํ. ตตฺถ สทฺธมฺเมหีติ สุธมฺเมหิ. สทฺโธติ โอกปฺปนสทฺธาย เจว ปจฺจกฺขสทฺธาย จ สมนฺนาคโต. ตตฺถ ทานสีลาทีนํ ผลํ สทฺทหิตฺวา ทานาทิปุญฺญกรเณ สทฺธา โอกปฺปนสทฺธา นาม. มคฺเคน อาคตสทฺธา ปจฺจกฺขสทฺธา นาม. ปสาทสทฺธาติปิ เอสาเอว. ตสฺสา ลกฺขณาทีนิ วิภาเวตพฺพานิ. ๒-

"สมฺปกฺขนฺทนลกฺขณา จ มหาราช สทฺธา สมฺปสาทนลกฺขณา จา"ติ หิ วจนโต อิทํ สทฺธาย ลกฺขณํ นาม. "ตีหิ ภิกฺขเว ฐาเนหิ สทฺโธ ปสนฺโน เวทิตพฺโพ, กตเมหิ ตีหิ. สีลวนฺตานํ ทสฺสนกาโม โหตี"ติอาทินา ๓- นเยน วุตฺตํ ปน สทฺธาย นิมิตฺตํ นาม. "โก จาหาโร สทฺธาย, สทฺธมฺมสฺสวนนฺติสฺส วจนียนฺ"ติ ๔- อยํ ปนสฺสา อาหาโร นาม. "สทฺธาปพฺพชิตสฺส ภิกฺขเว ภิกฺขุโน อยมนุธมฺโม โหติ, ยํ รูเป นิพฺพิทาพหุโล วิหริสฺสตี"ติ ๕- อยมสฺส อนุธมฺโม นาม. "สทฺธา พนฺธติ ปาเถยฺยํ, สิรี โภคานมาสโย. ๖- สทฺธา ทุติยา ปุริสสฺส โหติ. ๗- สทฺธาย ตรติ โอฆํ. ๘- สทฺธา พีชํ ตโป วุฏฺฐิ. ๙- สทฺธาหตฺโถ มหานาโค. อุเปกฺขาเสตทนฺตวา"ติ- อาทีสุ ปน สุตฺเตสุ เอติสฺสา พทฺธภตฺตปุฏาทิสริกฺขตาย อเนกสรสตา ภควตา ปกาสิตา. อิมสฺมึ ปน นคโรปมสุตฺตนฺเต เอสา อจลสุปฺปติฏฺฐิตตาย เอสิกาถมฺภสทิสา กตฺวา ทสฺสิตา.

สทฺเธสิโกติ สทฺธํ เอสิกาถมฺภํ กตฺวา อริยสาวโก อกุสลํ ปชหตีติ อิมินา นเยน สพฺพปเทสุ โยชนา กาตพฺพา. อปิเจตฺถ หิโรตฺตปฺเปหิ ตีสุ ทฺวาเรสุ สํวโร