7. Uggasuttavaṇṇanā

[7] Sattame uggo rājamahāmattoti pasenadikosalassa mahāamacco. Upasaṅkamīti bhuttapātarāso upasaṅkami. Addhoti nidhānagatena dhanena addho. Migāro rohaṇeyyoti rohaṇaseṭṭhino nattāraṃ migāraseṭṭhiṃ sandhāyevamāha. Mahaddhanoti vaḷañjanadhanena mahādhano. Mahābhogoti upabhogaparibhogabhaṇḍassa mahantatāya mahābhogo. Hiraññassāti suvaṇṇasseva. Suvaṇṇameva hissa koṭisaṅkhaṃ ahosi. Rūpiyassāti sesassa taṭṭakasaraka- attharaṇapāpuraṇādino paribhogaparikkhārassa pamāṇasaṅkhāne vādoyeva natthi.