2. Dutiyauggasuttavaṇṇanā

[22] Dutiye nāgavaneti tassa kira seṭṭhino nāgavanaṃ nāma uyyānaṃ, so tattha purebhattaṃ gandhamālādīni gāhāpetvā uyyānakīḷaṃ kīḷitukāmo gantvā parivāriyamāno bhagavantaṃ addasa. Saha dassanenevassa purimanayeneva cittaṃ pasīdi, surāpānena ca uppannamado taṃkhaṇaṃyeva pahiyyi. Taṃ sandhāyevamāha. Oṇojesinti udakaṃ hatthe pātetvā adāsiṃ. Asokoti amuko. Samacittova demīti "imassa thokaṃ dammi, imassa bahukan"ti evaṃ cittanānattaṃ na karomi, deyyadhammampana ekasadisaṃ karomīti dasseti. Ārocentīti ākāse ṭhatvā ārocenti. Natthi taṃ saṃyojananti iminā upāsako attano anāgāmiphalaṃ byākaroti.