5. Sāmaññavagga

1. Sambādhasuttavaṇṇanā

[42] Pañcamassa paṭhame udāyīti kāḷudāyitthero. Avidāti aññāsi. Bhūrimedhasoti mahāpañño. Yo jhānamanubujjhi buddhoti yo jhānaṃ abujjhi. Paṭilīnanisabhoti ekībhāvavasena paṭilīno ceva uttamaṭṭhena ca nisabho. Munīti buddhamuni. Pariyāyenāti ekena kāraṇena. Kāmasambādhassa hi abhāvamatteneva paṭhamajjhānaṃ okāsādhigamo nāma, na sabbathā sabbaṃ. Tatrapatthi sambādhoti tasmiṃpi paṭhamajjhāne satipi sambādho paṭipīḷanā atthiyeva. Tatthapitthītipi pāṭho. Kiñca tattha sambādhoti tasmiṃ pana jhāne kiṃ sambādho nāma. Ayamettha sambādhoti ayaṃ vitakkavicārānaṃ aniruddhabhāvo sambādho sampīḷā nāma. Iminā upāyena sabbavāresu attho veditabbo. Nippariyāyenāti na ekenākārena, athakho āsavakkhayo nāma sabba- sambādhānaṃ pahīnattā sabbena sabbaṃ eko okāsādhigamo nāmāti.