2. Vassakārasuttavaṇṇanā

[22] Dutiye abhiyātukāmoti abhibhavanatthāya yātukāmo. Vajjīti vajjirājāno. Evaṃmahiddhiketi evaṃ mahatiyā rājiddhiyā samannāgate. Etena nesaṃ samaggabhāvaṃ katheti. Evaṃmahānubhāveti evaṃ mahantena rājānubhāvena samannāgate. Etena nesaṃ hatthisippādīsu katasikkhataṃ katheti, yaṃ sandhāya vuttaṃ "sikkhitā vatime licchavikumārā susikkhitā vatime licchavikumārā, yatra hi nāma sukhumena tāḷacchiggaḷena asanaṃ atipātayissanti poṅakhānupoṅkhaṃ avirādhitan"ti. Ucchejjissāmīti ucchindissāmi.

Anayabyasananti avuḍḍhiñceva ñātibyasanañca. Āpādessāmīti pāpayissāmi.

Iti kira so ṭhānanisajjādīsu imaṃ yuddhakathameva katheti, "gamanasajjā hothā"ti ca balakāyaṃ āṇāpeti. Kasmā? gaṅgāya tīre ekaṃ paṭṭanagāmaṃ nissāya aḍḍhayojanaṃ ajātasattuno vijitaṃ, aḍḍhayojanaṃ licchavīnaṃ. Tatra pabbatapādato mahagghagandhabhaṇḍaṃ otarati. Taṃ sutvā "ajja yāmi, sve yāmī"ti ajātasattuno saṃvidahantasseva licchavino samaggā sammodamānā puretaraṃ āgantvā sabbaṃ gaṇhanti. Ajātasattu pacchā āgantvā taṃ pavuttiṃ ñatvā kujjhitvā gacchati. Te puna saṃvaccharepi tatheva karonti. Athakho so balavāghātajāto, tadā evamakāsi.