4. Dutiyaaggisuttavaṇṇanā

[47] Catutthe uggatasarīrassāti so kira brāhmaṇamahāsālo atta- bhāvenapi bhogehipi uggato sārappatto ahosi, tasmā uggatasarīrotveva paññāyittha. Upakkhaṭoti paccupaṭṭhito. Thūṇūpanītānīti yūpasaṅkhātaṃ thūṇaṃ upanītāni. Yaññatthāyāti vadhitvā yajanatthāya. Upasaṅkamīti so kira sabbantaṃ yaññasambhāraṃ sajjetvā cintesi "samaṇo kira gotamo mahāpañño, kiṃ nu kho me yaññassa vaṇṇaṃ kathessati udāhu avaṇṇaṃ, pucchitvā jānissāmī"ti iminā kāraṇena yena bhagavā tenupasaṅkami. Aggissa ādānanti yaññassa yajanatthāya navassa maṅgalaggino ādiyanaṃ. Sabbena sabbanti sabbena sutena sabbaṃ sutaṃ sameti saṃsandati, ekasadisaṃ hotīti dasseti. Satthānīti vihiṃsanaṭṭhena satthāni viyāti satthāni. Sayaṃ paṭhamaṃ samārabhatīti attanāva paṭhamataraṃ ārabhati. Haññantūti hanantu.

@4 cha.Ma. samārambhatīti 5 cha.Ma. hantunti hanituṃ