6. Abyākatavagga

1. Abyākatasuttavaṇṇanā

[54] Chaṭṭhavaggassa paṭhame abyākatavatthūsūti ekaṃsādivasena akathitavatthūsu. Tathāgatoti satto. Diṭṭhigatametanti micchādiṭṭhimattakametaṃ, na tāya diṭṭhiyā gahitasatto nāma atthi. Paṭipadanti ariyamaggaṃ. Na chambhatīti diṭṭhivasena na kampati. Sesapadesupi eseva nayo. Taṇhāgatanti diṭṭhitaṇhā. Saññāgatādīsupi eseva nayo.

Ettha ca diṭṭhiggahaṇena dvāsaṭṭhidiṭṭhiyo, diṭṭhinirodhagāminīpaṭipadāgahaṇena sotāpattimaggova gahitoti.