9. Mettasuttavaṇṇanā

[62] Navame mā bhikkhave puññānaṃ bhāyitthāti puññāni karontā tesaṃ mā bhāyittha. Mettacittaṃ bhāvesinti tikacatukkajjhānikāya mettāya sampayuttaṃ paṇītaṃ katvā cittaṃ bhāvesinti dasseti. Saṃvaṭṭamāne sudāhanti saṃvaṭṭamāne sudaṃ ahaṃ. Saṃvaṭṭamāneti jhāyamāne vinassiyamāne. Dhammikoti dasakusaladhammasamannāgato. Dhammarājāti idamassa vevacanaṃ. Dhammena vā laddharajjattā dhammarājā. Cāturantoti

Vijitāvīti vijitasaṅgāmo. Janapado tasmiṃ thāvariyaṃ thirabhāvaṃ pattoti janapadatthāvariyappatto. Parosahassanti atirekasahassaṃ. Sūrāti abhīruno. Vīraṅgarūpāti vīrānaṃ aṅgaṃ vīraṅgaṃ. Viriyassetaṃ nāmaṃ. Vīraṅgaṃ rūpametesanti vīraṅgarūpā. Viriyajātikā viriyasabhāvā mahāviriyā viya akilāsuno divasaṃpi yujjhantā na kilamantīti vuttaṃ hoti. Sāgarapariyantanti cakkavāḷapabbataṃ sīmaṃ katvā ṭhitasamuddapariyantaṃ. Adaṇḍenāti dhanadaṇḍenāpi chejjabhejjānusāsanena satthadaṇḍenapi vināyeva. Asatthenāti ekatodhārādinā paraviheṭhanasatthenapi vināyeva. Dhammena abhivijiyāti ehi kho mahārājāti evaṃ paṭirājūhi sampaṭicchitāgamano "pāṇo na hantabbo"tiādinā dhammeneva vuttappakāraṃ paṭhaviṃ abhivijinitvā.

Sukhesinanti sukhapariyesake satte āmanteti. Suññabrahmūpagoti suññabrahma- vimānappatto. Paṭhaviṃ imanti imaṃ sāgarapariyantaṃ mahāpaṭhaviṃ. Asāhasenāti na sāhasiyakammena. Samena manusāsitanti samena kammena anusāsi. Tehi etaṃ sudesitanti tehi saṅgāhakehi mahākāruṇikehi buddhehi etaṃ ettakaṃ ṭhānaṃ sudesitaṃ sukathitaṃ. Paṭhabyoti paṭhavīsāmiko.