5. Pāricchattakasuttavaṇṇanā

[69] Pañcame pannapalāsoti patitapalāso. Jālakajātoti sañjātapattapupphajālo. Tassa hi pattajālañca pupphajālañca saheva nikkhamati. Khārakajātoti pāṭiekkaṃ saṇṭhitena suvibhattakena pattajālakena ca pupphajālakena ca samannāgato. Kuḍumalakajātoti sañjātamakulo. Kokāsakajātoti avikasitehi mahākucchīhi sambhinnamukhehi pupphehi samannāgato. Sabbaphāliphulloti sabbākārena supupphito. Dibbe cattāro māseti dibbena āyunā cattāro māse. Manussagaṇanāya pana tāni dvādasavassasahassāni honti. Paricārentīti ito cito ca indariyāni cārenti, kīḷanti ramantīti attho.

Ābhāya phuṭaṃ hotīti tattakaṃ ṭhānaṃ obhāsena phuṭaṃ hoti. Tesañhi pupphānaṃ bālasuriyassa viya ābhā hoti, pattāni paṇṇacchattappamāṇāni, anto