Dutiyaṃpi khoti dutiyavārasmimpi. Imasmiṃpi vāre buddhassa vaṇṇaṃ bhāsantā tusitabhavanato paṭṭhāya yāva mahābodhipallaṅkā dasabalassa heṭṭhā pādatalehi upari kesaggehi paricchinditvā dvattiṃsamahāpurisalakkhaṇaasītianubyañjanabyāmappabhāvasena sarīravaṇṇaṃ kathayiṃsu. Dhammassa vaṇṇaṃ bhāsantā "ekapadepi ekabyañjanepi avakhalitaṃ nāma natthī"ti sukathitavaseneva dhammaguṇaṃ kathayiṃsu. Saṃghassa vaṇṇaṃ bhāsantā "evarūpaṃ yasasirivibhavaṃ pahāya satthu sāsane pabbajitā na kosajjapakatikā honti, terasasu pana dhutaṅgaguṇesu paripūrakārino hutvā sattasu anupassanāsu kammaṃ karonti, aṭṭhatiṃsaārammaṇavibhattiyo vaḷañjentī"ti paṭipadāvasena saṃghaguṇe kathayiṃsu.
Tatiyavāre pana buddhassa vaṇṇaṃ bhāsamānā "itipi so bhagavā"ti suttantapariyāyeneva buddhaguṇe kathayiṃsu, "svākkhāto bhagavatā dhammo"tiādinā suttantapariyāyeneva dhammaguṇe, "supaṭipanno bhagavato sāvakasaṃgho"tiādinā suttanta- pariyāyeneva saṃghaguṇe ca kathayiṃsu. Tato sīho cintesi "imesañca licchavirāja- kumārānaṃ tatiyadivasato paṭṭhāya buddhadhammasaṃghaguṇe kathentānaṃ mukhaṃ nappahoti, addhā anomaguṇena samannāgato so bhagavā, imaṃ dāni uppannapītiṃ avijahitvāva ahaṃ ajja sammāsambuddhaṃ passissāmī"ti. Athassa "kiṃ hi me
Tattha kiṃ hi me karissantīti kiṃ nāma mayhaṃ nigaṇṭhā karissanti. Apalokitā vā anapalokitā vāti āpucchitā vā anāpucchitā vā. Na hi me te āpucchitā yānavāhanasampattiṃ, na ca issariyavisesaṃ dassanti, nāpi panāpucchitā harissanti, aphalaṃ etesaṃ āpucchanti adhippāyo.
Vesāliyā niyyāsīti yathā hi gimhakāle deve vuṭṭhe udakaṃ sandamānaṃ nadiṃ otaritvā thokameva gantvā tiṭṭhati nappavattati, evaṃ sīhassa paṭhamadivase "dasabalaṃ passissāmī"ti uppannāya pītiyā nigaṇṭhena paṭibāhitakālo. Yathā pana dutiyadivase deve vuṭṭhe udakaṃ sandamānaṃ nadiṃ otaritvā thokaṃ gantvā vālikāpuñjaṃ paharitvā appavattaṃ hoti, evaṃ sīhassa dutiyadivase "dasabalaṃ passissāmī"ti uppannāya pītiyā nigaṇṭhena paṭibāhitakālo. Yathā tatiyadivase deve vuṭṭhe udakaṃ sandamānaṃ nadiṃ otaritvā purāṇapaṇṇasukkhadaṇḍakaṭṭhakacavarādīni parikaḍḍhantaṃ vālikāpuñjaṃ bhinditvā samuddaninnameva hoti, evaṃ sīho tatiyadivase tiṇṇaṃ vatthūnaṃ guṇakathaṃ sutvā uppanne pītipāmojje "aphalā nigaṇṭhā nipphalā nigaṇṭhā, kiṃ me ime karissanti, gamissāmahaṃ satthu santikan"ti manaṃ abhinīharitvā velāliyā niyyāsi. Niyyanto ca "cirassāhaṃ dasabalassa santikaṃ gantukāmo jāto, na kho pana me yuttaṃ aññātakavesena gantun"ti "ye keci dasabalassa santikaṃ gantukāmā, sabbe nikkhamantū"ti ghosanaṃ kāretvā pañcarathasatāni yojāpetvā uttamarathe ṭhito tehi ceva pañcahi rathasatehi mahatiyā ca parisāya parivuto gandhapupphacuṇṇavāsādīni gāhāpetvā niyyāsi. Divā divassāti divasassa divā, majjhantike atikkantamatte.