@2 cha.Ma. ayaṃ pāṭho na dissati 3 cha.Ma. santhambhanatthāya 4 cha.Ma. tampi so

@5 Ma.na paṭikkamissati, cha.na paṭikkamissatīti ca Maññeyyāsīti pubbe dasapi vīsatipi saṭṭhipi jane āgate disvā natthīti avatvā desi, idāni maṃ saraṇaṃ gatakāraṇamatteneva mā imesaṃ deyyadhammaṃ upacchindi. Sampattānañhi dātabbamevāti ovadi. Sutametaṃ bhanteti kuto sutanti? nigaṇṭhānaṃ santikā. Te kira kulagharesu evaṃ pakāsenti "mayaṃ yassa kassaci sampattassa dātabbanti vadāma, samaṇo pana gotamo `mayhameva dānaṃ dātabbaṃ na aññesaṃ, mayhameva sāvakānaṃ dātabbaṃ, na aññesaṃ sāvakānaṃ, mayhameva dinnaṃ mahapphalaṃ, na aññesaṃ, mayhameva sāvakānaṃ dinnaṃ mahapphalaṃ, na aññesan'ti evaṃ vadatī"ti. Taṃ sandhāya ayaṃ "sutametan"ti āha.

Anupubbikathanti dānānantaraṃ sīlaṃ, sīlānantaraṃ saggaṃ, saggānantaraṃ magganti evaṃ anupaṭipāṭiyā kathaṃ. Tattha dānakathanti idaṃ dānaṃ nāma sukhānaṃ nidānaṃ, sampattīnaṃ mūlaṃ, bhogānaṃ patiṭṭhā, visamagatassa tāṇaṃ leṇaṃ gati parāyanaṃ, idhalokaparalokesu dānasadiso avassayo patiṭṭhā ārammaṇaṃ tāṇaṃ leṇaṃ gati parāyanaṃ natthi. Idañhi avassayaṭṭhena ratanamayasīhāsanasadisaṃ, patiṭṭhānaṭṭhena mahāpaṭhavīsadisaṃ, ālambanaṭṭhena ālambanarajjusadisaṃ. Idañhi dukkhanittharaṇaṭṭhena nāvā, samassāsanaṭṭhena saṅgāmasūro, bhayaparittāṇaṭṭhena susaṅkhatanagaraṃ, maccheramalādīhi anūpalittaṭṭhena padumaṃ, nesaṃ niddahanaṭṭhena aggi, durāsadaṭṭhena āsīviso, asantāsanaṭṭhena sīho, balavantaṭṭhena hatthī, abhimaṅgalasammataṭṭhena setavasabho, khemantabhūmisampāpanaṭṭhena valāhako assarājā. Dānannāmetaṃ mayā gatamatto mayheso vaṃso, mayā dasapāramiyo pūrentena velāmamahāyañño mahāgovinda- mahāyañño mahāsudassanamahāyañño vessantaramahāyaññoti anekamahāyaññā pavattitā, sasabhūtena jalite aggikkhandhe attānaṃ niyyādentena sampattayācakānaṃ cittaṃ gahitaṃ.