8. Dutiyabalasuttavaṇṇanā

[28] Aṭṭhame balānīti ñāṇabalāni. Āsavānaṃ khayaṃ paṭijānātīti arahattaṃ paṭijānāti. Aniccatoti hutvā abhāvākārena. Yathābhūtanti yathāsabhāvato. Sammappaññāyāti sammāvipassanāmaggapaññāya. Aṅgārakāsūpamāti santāpanaṭṭhena aṅgārakāsuyā upamitā ime kāmā. Vivekaninnanti phalasamāpattivasena nibbānaninnaṃ. Vivekaṭṭhanti kilesehi vajjitaṃ dūrībhūtaṃ vā. Nekkhammābhiratanti pabbajjāya abhirataṃ. Byantībhūtanti vigatantībhūtaṃ ekaṃsenāpi anallīnaṃ vippayuttaṃ visaṃsaṭṭhaṃ. Āsavaṭṭhāniyehīti sampayogavasena āsavānaṃ kāraṇabhūtehi, kilesadhammehīti attho. Athavā byantībhūtanti vigatantībhūtaṃ nittaṇhanti attho. Kuto? sabbaso āsavaṭṭhāniyehi dhammehi, sabbehi tebhūmikadhammehīti attho. Imasmiṃ sutte ariyamaggo lokiyalokuttaro kathito.