3. Meghiyasuttavaṇṇanā

[3] Tatiye cālikāyanti evaṃnāmake nagare. Taṃ kira calapaṅkaṃ nissāya katattā olokentānaṃ calamānaṃ viya upaṭṭhāti, tasmā cālikāti saṅkhaṃ gataṃ. Cālikāpabbateti

@4 cha.Ma. paṭisevitabbādīni 5 cha.Ma. calamaggaṃ Sopi pabbato sabbasetattā kāḷapakkhuposathe olokentānaṃ calamāno viya upaṭṭhāti, tasmā cālikāpabbatoti vutto. Tattha mahantaṃ vihāraṃ kārayiṃsu. Iti bhagavā taṃ nagaraṃ nissāya cālikāpabbatamahāvihāre viharati. Jantugāmanti evaṃnāmakaṃ aparaṃpi tasseva vihārassa gocaragāmaṃ. Jattugāmantipi paṭhanti. Padhānatthikassāti padhānakammikassa. Padhānāyāti samaṇadhammakaraṇatthāya. Āgamehi tāvāti satthā therassa vacanaṃ sutvā upadhārento "na tāvassa ñāṇaṃ paripakkan"ti ñatvā paṭibāhanto evamāha. Ekakamhi tāvāti idaṃ panassa "evamayaṃ gantvāpi kamme anipphajjamāne nirāsaṅko hutvā pemavasena puna āgacchissatī"ti cittamaddavajananatthaṃ āha. Natthi kiñci uttariṃ karaṇīyanti catūsu saccesu catunnaṃ kicchānaṃ katattā aññaṃ uttariṃ karaṇīyaṃ nāma natthi. Katassa vā paṭicayoti katassa vā puna paṭicayopi natthi. Na hi bhāvitamaggo puna bhāvīyati, na pahīnakilesānaṃ puna pahānaṃ atthi. Padhānanti kho meghiya vadamānaṃ kinti vadeyyāmāti "samaṇadhammaṃ karomī"ti taṃ vadamānaṃ mayaṃ aññaṃ kinnāma vadeyyāma.