Gūthagatanti gūthameva. Sesesupi eseva nayo. Paṭhavīsamenāti akujjhanaṭṭhena adussanaṭṭhena paṭhaviyā samānena. Na hi paṭhavī "mayi suciṃ nikkhipantī"ti somanassaṃ karoti, na "asuciṃ nikkhipantī"ti domanassaṃ. Mayhaṃpi evarūpaṃ cittanti dasseti. Vipulenāti aparittena. Mahaggatenāti mahantabhāvaṃ gatena. Appamāṇenāti vaḍḍhitap- pamāṇena. Averenāti akusalaverapuggalaverarahitena. Abyāpajjhenāti niddukkhena vigata- domanassena. So idhāti so anupaṭṭhitakāyānupassanāsatipaṭṭhāno bhikkhu evaṃ kareyya, mādiso kathaṃ evarūpaṃ karissati bhanteti paṭhamaṃ sīhanādaṃ nadi. Evaṃ sabbattha yojanā veditabbā.

Rajoharaṇanti rājasammajjanacoḷakaṃ, pādapuñchananti tassetaṃ nāmaṃ. Kaḷopihatthoti pacchihattho ukkhalihattho vā. Nantikavāsīti antacchinnapilotikavasano. Suratoti sucisīlo soraccena samannāgato. Sudantoti suṭṭhu damathaṃ upagato. Susikkhitoti suṭṭhu sikkhito. Na kiñci hiṃsatīti visāṇādīsu gaṇhantaṃpi piṭṭhiṃ parimajjantaṃpi na kañci viheṭheti. Usabhacchinnavisāṇasamenāti usabhassa chinnavisāṇassa cittasadisena.

Aṭṭiyeyyāti aṭṭo pīḷito bhaveyya. Harāyeyyāti lajjeyya. Jiguccheyyāti jigucchaṃ āpajjeyya.