@dhuvā 3 Ma. assātabhāvena Puttabhātikesu mettaṃ paṭilabhitvā kālaṃ katvā devamanussesu nibbattanti. Devatāyo ākāsena carantiyo ārocenti "na idaṃ ṭhānaṃ sassataṃ na nivaddhaṃ, mettaṃ bhāvetha, karuṇaṃ, muditaṃ, upekkhaṃ bhāvethā"ti. Te mettādayo bhāvetvā tato cutā brahmaloke nibbattanti.

Bījagāmāti ettha bījagāmā nāma pañca bījajātāni. Bhūtagāmo nāma yaṅkiñci nikkhantamūlapaṇṇaṃ harītakaṃ. Osadhitiṇavanappatayoti ettha osadhīti osatharukkhā. Tiṇāti bahisārā tālanāḷikerādayo. Vanappatayoti vanajeṭṭhakarukkhā. Kunnadiyoti ṭhapetvā pañca mahānadiyo avasesā ninnagā. Kusobbhāti ṭhapetvā satta mahāsare avasesā rahadādayo. Dutiyo sūriyotiādīsu dutiyasūriyakāle eko udeti, eko atthaṅgameti. Tatiyakāle eko udeti, eko atthaṅgameti, eko majjhe hoti. Catutthakāle catukulike gāme cattāro piṇḍacārikā divārapaṭipāṭiyā ṭhitā viya honti. Pañcamādikālepi eseva nayo. Palujjantīti chijjitvā patanti. Neva chārikā paññāyati na masīti cakkavāḷamahāpaṭhavī sinerupabbatarājā himavā cakkavāḷapabbato cha kāmasaggā paṭhamajjhānabhūmikabrahmalokāti ettake ṭhāne daḍḍhe accharāya gahetabbamattāpi chārikā vā aṅgāro vā na paññāyati. Ko mantā ko saddhātāti ko tassa saddhāpanatthāya samattho, ko vā tassa saddhātā. Aññattara diṭṭhapadehīti diṭṭhapade sotāpanne ariyasāvake ṭhapetvā ko aññe saddahissatīti attho.

Vītarāgoti vikkhambhanavasena vītarāgo. Sāsanaṃ ājāniṃsūti anusiṭṭhiṃ jāniṃsu, brahmalokasahabyatāya maggaṃ paṭipajjiṃsu. Samasamagatiyoti dutiyakabhave sabbākārena samagatiko ekagatiko. Uttari mettaṃ bhāveyyanti paṭhamajjhānato uttari yāva tikacatukkajjhānaṃ paṇītaṃ katvā mettaṃ bhāveyyaṃ. Cakkhumāti pañcahi cakkhūhi cakkhumā.